[養寵物前須知]照顧毛孩是一生的承諾，決定前考慮清楚！ | 9SERIESHK

HOME >> BLOG >> 毛孩資訊 >> 本篇文章

毛孩們除咗可愛，仲會喺你嘅身邊陪住你分享快樂時光、難過嘅時候為你帶來慰藉，咁忠實嘅伙伴仲可以喺邊度搵到？9SERIESHK 同樣身為毛孩家長，曾經都做過新手家長，幻想住迎接毛孩成為家中一分子，一同成長，一齊度過幸福嘅每一日，當然最後只係幻想啦，現實除咗美好總係會遇上唔少跌盪。喺你做決定之前，不如一齊睇吓養寵物之前有咩需要考慮同準備啦！

養寵物前須知：為自己同毛孩做好Research

喺飼養寵物之前，最優先要梗係要評估吓自己適唔適合養寵物啦，如果平時都係三分鐘熱度的話，就更加要考慮清楚。最好就做個詳細嘅資料搜集再作打算，例如毛孩嘅種類、體型、香港嘅氣候是否適合、照顧毛孩嘅方式、養毛孩後嘅開支以至到佢哋日常需要嘅營養同運動量都大有學問㗎。即使你願意無限咁付出愛心，都要記得量力而為呀。

生活方式

Work Life Balance 好重要，對毛孩嚟講同樣重要，如果你工時好長，甚少留喺屋企，又或者經常需要出差，出外社交生活而無辦法陪伴毛孩的話，就請好好考慮清楚。毛孩的世界只有你，佢哋最需要家長嘅陪伴同關注，焦慮症唔只人類會有，其實毛孩亦會出現焦慮症，嚴重嘅更加有機會導致到行為問題。
經濟能力是否充裕

除咗對毛孩嘅愛之外，個人經濟能力亦係考慮因素，唔只要計劃日常糧食嘅費用，加上毛孩嘅日用品、醫療費用或者美容都係長期嘅開支，假如毛孩出現行為問題的話，行為訓練亦係一大筆開支嚟㗎！

去少幾次旅行未必幫到你買樓，但如果要為毛孩安排寄宿酒店、托管服務，費用亦好可觀㗎。
寵物健康、醫療問題

毛孩嘅健康、醫療問題亦要留意，貓狗毛孩平均嘅壽命為 10 到 20 歲，年老嘅毛孩身體出現機能問題都好常見，其中常見嘅心臟、肝、腎功能同關節痛症問題亦困擾唔少毛孩家長。毛孩每次睇醫生基本診金大約數百至一千（未計藥費、檢查、手術費同住院費用），家長們除咗自己為毛孩儲蓄醫療費用，都可以參考吓市面上為毛孩而設嘅寵物保險計劃作比較，記住要及早計劃好，以備不時之需之外。
居住環境是否適合

喺香港生活唔係易事，住屋問題一直嚴重，相信對香港人同毛孩嚟講都係，或者你可以忍受蝸居空間少，但其實接納毛孩生活嘅空間更少，因為唔係所有住宅都可以自由飼養寵物，例如公屋或者居屋住戶只可以養小型家居寵物而不需申請，但並不包括狗狗，只有需要特殊情況下先可以飼養狗狗。假設係私樓租戶，私人屋苑亦好大機會受到大廈公契條款約束，即使業主同意，被投訴或發現違反公契時亦需要承擔後果。喺決定養寵物之前，記得要check清楚你嘅居所可唔可以養寵物。

除此之外，亦要考慮返毛孩嘅品種、習性，毛孩BB嘅時候同成年嘅體型可以相差好大，喺養寵物前就需要考慮毛孩成長後，居所有冇足夠空間俾佢活動。如果飼養狗狗的話，都要計劃好訓練，因為吠叫可以話係佢哋嘅天性，即使你居住嘅地方可以飼養，一樣有機會收到投訴㗎。
寵物訓練

作為毛孩家長，雖然唔使為毛孩升學問題擔心，但其實都有機會要供書教學。雖然叫做pet training，但更需要家長學習正確同毛孩相處嘅方式，毛孩調皮搗蛋嘅行為，往往可能係得唔到家長嘅關注，一定要及早正視，由最早期嘅定點如廁訓練，去到要教識佢哋唔好破壞屋企嘅傢俬、物品，過程可能好漫長，但相信只要家長花愛心、時間、耐性去教導，一定可以同毛孩一齊成長。

「一生的承諾」

相信即使你未養過寵物，都有接觸過養寵物嘅朋友，但唔好俾幸福溫馨嘅幻想蒙蔽，因為無論你相處嘅對象係人定小動物，除咗美好嘅時光，亦要考慮現實生活嘅一面，養寵物需要嘅金錢開支、責任承擔、時間同精神其實一啲都唔少，要做好心理準備。

無論係新手毛孩家長定係準備成為家長，由你迎接毛孩返屋企開始，佢嘅世界就只有你，而照顧毛孩更加係一生嘅承諾同責任。喺決定飼養寵物之前，一定要花點時間了解吓，考慮清楚先至做決定喇。